خرافة الصبيّة حورية

يحكيو على صبيّة مزيانة

ضامرة و زعبانة

تسكن بحذانا

غاررها شبابها

تحكم باحكامها

و من شباكها

تشاور لاحبابها

احبابها برشا

على شكون ترضى

و هي في كْنانها

كاتمة حنانها

في شباك لعْلي

تصبّح و تمسّي تْكذّب و تنسّي

نفسها تكدّرت

و الوقت الي يجري تفكرت

الّي قلبها خالي و فكرها هاوي

هاوي فارس في بّرو خانس

لاهي على بالو آما هو على بالها

من شبّاكها طيّشت احبالها

تحت ستار الليل

قصدت طْريق خالي

لا حكّرت لا تالي و لا والي

شقّت برور و طوابي

على الفارس الخانس تلاجي

و الفارس خانس ماهو داري و حاسس

بين الاحواش …عرضوها الاوحاش

ددّمه و خشخاش

و هي مزيانة

ضامرة و زعبانة

كيفاش تتعدّى بجنبنا و ما نذوقوهاش ؟

هي غاررها شبابها

تحكم باحكامها

ما نجّموهاش

طارت بجناحها

و في برّ الفارس رْساتْ

من زنقة لزنقة سمعت عليه حكايات

تشبه لروميو حبيب جوليات

عندو وهْرة البايات

قلّك فارس مزيان

ديقوردي و فنان

قلبو خالي وفكرو هاوي

يصبّح و يمسّي يْكذّب و ينسّي

 يرسم في جنان

كلو الوان

هوّا هكّاكة

لْمج الصبية المزيانة

كيف الحورية سحرتو

و قلبو ليها مال

طارلها بلاش عقل و قلها منين هالعسل ؟

هي بعد سفر و برشا تعب

ما عاد همها اش هدر

حشمت دنقزت عينيها

و سارت على خطاويها

قالت هذا فاضي شغل

عينو فارغة و نفسو مايعة

هو كي شافها وخرت و حشمت

دنقز عينيه

استغفر مولاه و كْتمْ شْهاويه

و قال حرام علي بنت الناس  مسافرة

لعلا ثنيتها طويلة و الا حكايتها غريبة

ما عرْفتّوش …و ما عرفهاش

و لكن فما احساس…..

مكتوب حتى ولو كان بنادم مايدراش …

و بعد لحظة … كانت النفوس تهدى

و بدات القلوب تهوى

طيّب خاطرها

هزّت حاجبها

هزّ عينو يودّع في خطوتها

جات العين في العين

ترمات في حضنو الحنين حكاتلو على شقاء السنين

و حْكالها قدّاش كان من غيرها حزين

و هكّا تلمّ شمل لحْبيبين

عاشو في سعادة و نعيم

كسبو المال و جابو البنين

هذي هي خرافة غيرنا

وانشاء الله نعيشو كيفهم اجمعين