قبقاب امي

قبقاب امي

 

قبقاب امي يعمل سته و ستين كيف

حسّو يبشّرني بالصيف

كورنو القلاص عل كرنيش

بنوار النوّار الّي هازوالريح

قبقاب امّي يعمل ستّه و ستّين كيف

حسّو في وسط الدّار يملى عليّ النهار

نثبت كي كانت تبعثني نقضي

عند الجزّار و الخضّار

و في الحومه العطّار سلومه

عل اردوازه يكردي الكبار و الصغار

كمشه حلوه بو دورو يقرطسهملي في جرنال

في الثنيه نخبّيهم في مكتوبي و نعمل روحي موش هوني

باش حتى مهفّ ما ياخذ عليّ الهفّ

اخر الصبحيّه تتلم الحوسه تقيّل القايله

وما عاد دور النمّوسه

وقبقاب امي ما عادش و يعمل ستّه ستّين كيف

يولّي يرقّدنا بالسّيف

كيف تبرد العشويّه و تحلى السهريّه

يرجع قبقاب امي يعمل ستّه ستّين كيف

الدّار تملى و تفرّغ

وامي توشحل و تفرح بالضّيف

العشويّات وذنين القاضي والقهيوات

يا حسره كيف كنا نتلمو بممّاتي

وتخرّفنا خرافات بنت القاضي و شهرزاد

واهفت و اركح و هيّا قوم اشطح

وكانك عالرّجال في السقيفه

يقرقرو في الشيشه

وبابا عزيزي التّحفون على قرنو مشموم

كبوسو و شاربو المقرون

يحكي عل الفلاّقه و المعمّر الّي دام قرون

والجاره فضيله بابها مشتّخ

مقعمزه على حافة البيت

تقطّع و تريّش و تقول يا لطيف

يا حسره على قبقاب امي

الّي كان يعمل ستّه و ستّين كيف

ليوم ولينا فاشيون فكتيم

fashion victim

نقلّنا لبرطمان بالكليم

Clim

و اللمّه ولاّت من حين لحين

كلّ فول لاهي في نوّارو

يشحق ما يلحق نهارو

يتغبّن على هاك الزّمان القديم

إلّي قعد منّو كان ذكريات و حنين…